როგორ ვიპოვოთ კამერის ან ჩამწერის RTSP ბმული

რა უნდა გაიგოთ

• მისამართი — ლოკალურ ქსელში კამერის IP (მაგ. 192.168.1.64), ინტერნეტიდან კი თქვენი საჯარო IP ან დომენი.
• RTSP პორტი — თითქმის ყოველთვის 554.
• მომხმარებელი და პაროლი — სჯობს ცალკე მომხმარებელი, რომელსაც მხოლოდ ლაივის ნახვის უფლება აქვს.
• გზა — ნაკადის მისამართი კამერის შიგნით, მაგ. /Streaming/Channels/101. ის მწარმოებელზეა დამოკიდებული.

ბმულის აგებულება დაწვრილებით ახსნილია სტატიაში რა არის RTSP.

1. მწარმოებლის დოკუმენტაცია და ვებ-ინტერფეისი

ყველაზე სანდო წყარო კამერის ინსტრუქციაა: მოძებნეთ სიტყვები „RTSP“ ან „stream URL“. შემდეგ გახსენით კამერის ვებ-ინტერფეისი ლოკალური ქსელიდან — ბრაუზერში აკრიფეთ კამერის IP. ქარხნული მისამართი Hikvision-ზე, როგორც წესი, 192.168.1.64-ია, Dahua-ზე — 192.168.1.108, თუმცა ჩამმონტაჟებელს ის, სავარაუდოდ, უკვე შეცვლილი აქვს.

• RTSP პორტი: Hikvision — Configuration → Network → Basic Settings → Port; Dahua და Uniview — Network → Port განყოფილება.
• კოდეკი: Hikvision — Configuration → Video/Audio → Video. ნაკადი უნდა იყოს H.264 ან H.265, არა MJPEG.
• ცალკე მომხმარებელი: Hikvision — Configuration → System → User Management → Add, დონე „User“, მხოლოდ Live View უფლებით; Dahua — System → Account. ჩვენს სისტემაში admin-ს ნუ შეიყვანთ.

2. ONVIF Device Manager

თუ გზა არ იცით, უფასო პროგრამა ONVIF Device Manager (Windows) თავად გეტყვით. ის კამერის ლოკალურ ქსელში უნდა გაუშვათ:

1. ჩართეთ კამერაზე ONVIF. ახალ Hikvision-ებზე ის ნაგულისხმევად გამორთულია: Configuration → Network → Advanced Settings → Integration Protocol — ჩართეთ და დაამატეთ ONVIF მომხმარებელი.
2. გაუშვით პროგრამა, ზედა ველებში შეიყვანეთ მომხმარებელი და პაროლი.
3. მარცხნივ სიაში აირჩიეთ კამერა და გახსენით Live video.
4. ვიდეოს ქვემოთ გამოჩნდება ნაკადის სრული მისამართი rtsp://... — დააკოპირეთ გზა.

3. შეამოწმეთ VLC-ით

სანამ დაშბორდში შეიყვანთ, ბმული VLC-ით შეამოწმეთ: Media → Open Network Stream (Ctrl+N), ჩასვით ბმული და დააჭირეთ Play.

rtsp://192.168.1.64:554/Streaming/Channels/101

მომხმარებელი და პაროლი ბმულში შეგიძლიათ არ ჩაწეროთ — VLC თავად მოგთხოვთ. თუ ვიდეო გაიხსნა, გზა და მონაცემები სწორია. Tools → Codec Information (Ctrl+J) გაჩვენებთ კოდეკს: H.264 თუ H.265. ინტერნეტიდან შესამოწმებლად იგივე გააკეთეთ ტელეფონით, Wi-Fi გათიშული — ლოკალური IP-ის ნაცვლად საჯარო IP-ით და გადამისამართებული პორტით.

ხშირი გზები მწარმოებლების მიხედვით

Hanwha-ზე N ვიდეოპროფილის ნომერია კამერის პარამეტრებიდან. Reolink-ის ახალ მოდელებზე RTSP შეიძლება ცალკე იყოს ჩასართავი ქსელის პარამეტრებში, H.265 მოდელებზე კი გზა h265-ით იწყება.

ჩამწერის (NVR/DVR) არხების ნუმერაცია

ჩამწერიდან ყველა კამერა ერთი მისამართითა და ერთი პორტით მოდის — განსხვავდება მხოლოდ არხის ნომერი გზაში:

• Hikvision: არხი × 100 + ნაკადი. მე-3 კამერის ძირითადი ნაკადი — /Streaming/Channels/301, დამატებითი — 302, მე-12 კამერის — 1201.
• Dahua: channel= პარამეტრში კამერის ნომერი: channel=3&subtype=0.
• Uniview: c ასოს შემდეგ: /unicast/c3/s0/live.

ზოგ ძველ ჰიბრიდულ ჩამწერზე IP არხების ნუმერაცია ანალოგური არხების შემდეგ იწყება, ამიტომ გადაამოწმეთ ჩამწერის ინსტრუქციაში. დაწვრილებით: NVR და DVR ჩამწერები.

სპეციალური სიმბოლოები პაროლში

ჩვენს დაშბორდში პაროლი ცალკე ველში იწერება — შეიყვანეთ ზუსტად ისე, როგორც არის, კოდირებას სისტემა თავად აკეთებს. მაგრამ თუ სრულ ბმულს VLC-ში ან სხვა პროგრამაში წერთ, ზოგი სიმბოლო უნდა „დაშიფროთ“, თორემ ბმული არასწორად წაიკითხება:

მაგალითად, პაროლი Kamera@2026 ბმულში ასე ჩაიწერება: rtsp://viewer:Kamera%402026@192.168.1.64:554/Streaming/Channels/101.

რას ნიშნავს კავშირის ტესტის შედეგი

• ავთენტიფიკაციის შეცდომა — ქსელი რიგზეა, მაგრამ მომხმარებელი ან პაროლი არასწორია, ან მომხმარებელს ნახვის უფლება არ აქვს. რამდენიმე წარუმატებელი ცდის შემდეგ ზოგი კამერა დროებით ბლოკავს შესვლას — მოიცადეთ და თავიდან სცადეთ.
• არასწორი გზა — კამერა პასუხობს, მაგრამ ასეთი ნაკადი არ აქვს. გადაამოწმეთ ცხრილი და არხის ნომერი.
• მიუწვდომელია / დრო ამოიწურა — სერვერი კამერამდე ვერ აღწევს: იხ. პორტის გადამისამართება.
• მხარდაუჭერელი კოდეკი — კამერაზე დააყენეთ H.264 ან H.265: იხ. კამერის პარამეტრები.